घोराही, २२ कार्तिक
आगामी मंसीर २१ गते हुने प्रतिनीधी सभा सदस्यका उमेद्वार राजु खनालले देशको हरेक विकासदेखी निकाससम्मका काम कांग्रेसको नेतृत्वमा भएको बताउदै अब पनि देशलाई कांग्रेसकै नेतृत्व आवश्यक भएको बताउनुभएको छ ।
नेपाली कांग्रेसको चुनावी कार्यक्रम अन्तरगत घोराही उपमहानगरपालिका– ७ मा भएको अगुवा कार्यकर्ता भेटघाट कार्यक्रममा बोल्दै खनालले यस्तो बताउनुभएको हो ।
देशका हरेक ठुलादेखी तल्लो स्तरका विकास कांग्रेसले गरेको उहाँको भनाई छ । देशमा प्रजातन्त्र, लोकतन्त्र, गणतन्त्र ल्याउनेदेखी मधेशमा देखिएको समस्या समाधानसम्म कांग्रेसले नेतृत्वदायी भूमीका खेलेको भन्दै खनालले अब संविधान कार्यान्वयन चुनौतिपूर्ण भएकाले यसको नेतृत्वपनि कांग्रेसले नै गर्न आवश्यक रहेको बताउनुभयो ।
यस क्षेत्रमा आफैलाई मत हाल्न नपाउने टुरिष्ट उमेद्वारहरु कम्यूनिष्ट दलहरुले ल्याएको भन्दै जनता झुक्याउने खेलमा लागेको खनालको भनाई छ ।
साथै उहाँले यस विषयमा सचेत रहन मतदाताहरुलाई अनुरोध गर्नुभयो । आँफूहरु सधै जनताको सेवकको रुपमा रहिरहेको बताउदै खनालले केही नेताहरु जनतालाइ दास सम्झेर टुरिष्टको रुपमा आएको आरोप लगाउनुभयो ।
यस क्षेत्रमा आँफू र अनिता देवकोटा सांसद रहदा हरेक क्षेत्रको विकास गरेको खनालले जानकारी गराउनुभयो ।
सडक सञ्जालदेखी पुल पुलेसो, विद्युत्, शिक्षा, स्वास्थ्य लगायतका क्षेत्रमा धेरै विकास गरेको भन्दै आगामी दिनमा निर्वाचित भएर गएपछि त्यसलाई निन्तरता दिन सकिने बताउनुभयो ।
कम्यूनिष्ट दलहरुले दाङ राजधानी बनाउछौँ भनेर दंगालीलाई झुक्याउन खोजेको भन्दै खनालले दाङ राजधानी बनाउने विषयलाई कांग्रेसले पहिलो मुद्धाको रुपमा अगाडी ल्याएको उहाँको भनाई छ ।
उहाँले देख्दा मोटोमात्र हुने गाईले दुध नदिनुभन्दा त दुध दिने सानो गाई नै ठिक भन्दै आफूलाई सानो गाईको रुपमा लिन मतदाताहरुलाई अनुरोध गर्नुभयो ।