घोराही १६ वडा कार्यालयद्वारा विद्यार्थीहरुलाई पोशाक प्रदान

घोराही, १५ पुस
घोराही उपमहानगरपालिका वडा नम्बर १६ ले श्री सिर्जनशील आधारभुत विद्यालय बाहुनडाँडाका विद्यार्थीहरुलाई न्यानो कपडा प्रदान गरेको छ । वडाले विद्यालयका १ सय १६ जना विद्यार्थीहरुलाई जाडो समयमा प्रयोग हुने पोशाक (न्यानो कपडा) प्रदान गरेको हो ।

वडा कार्यालयले विद्यालयमा एक कार्यक्रमको आयोजना गरि पोशाक प्रदान गरिएको थियो ।

वडाअध्यक्ष ताराबहादुर डिसीको अध्यक्षतामा भएको पोशाक वितरण कार्यक्रममा विद्यालय व्यवस्थापन समितिका पदाधिकारी, शिक्षक, अभिभावक, विद्यार्थीहरुको सहभागिता रहेको थियो । विद्यालयका प्रधानाध्यापक रमेशकुमार पाण्डेले विद्यालयको शैक्षिक तथा भौतिक स्थितिको बारेमा जानकारी गराउनुभएको थियो ।

विद्यालयमा कक्षा नर्सरीदेखी ८ कक्षासम्म अध्ययनरत १ सय १६ विद्यार्थीहरुलाई विद्यालय ट्रयाक सुट, टिसर्ट पाएसँगै विद्यार्थी एवं अभिभावकहरुले वडा कार्यालयलाई धन्यवाद ज्ञापन गरेका थिए ।

कार्यक्रममा बोल्दै वडा अध्यक्ष ताराबहादुर डिसीले वडा कार्यालयले वडाबासीहरुको तत्काल र दिर्घकालिन आवश्यकतालाई मध्यनजर गर्दै काम गरिरहेको बताउनुभयो । वडामा रहेका सामुदायिक विद्यालयहरुको शैक्षिक र भौतिक गुणस्तरकालागि एवं विद्यार्थीहरुलाई अध्ययनमा सहजता होस् भनेर काम गरिरहेको उहाँको भनाई थियो ।

वडा कार्यालयले यस अगाडी प्रा.वि करौतिडाँडा र प्रा.वि.सानी अम्बापुरमा अध्ययनरत विद्यार्थीहरुलाई पोशाक वितरण गरेको वडाध्यक्ष डिसीले जानकारी दिनुभयो । कार्यक्रमको सहजिकरण विद्यालयका शिक्षक सुवास पुनले गर्नुभएको थियो ।