मनसुनको न्यूनचापीय रेखाको पूर्वी भाग नेपालतर्फ सर्दै, आज यी प्रदेशमा भारी वर्षा हुने

मनसुनको न्यूनचापीय रेखा नेपालतर्फ सर्ने क्रम जारी रहँदा मुलुकका विभिन्न भूभागमा भारी वर्षा भइरहेको छ।

न्यून चापीय रेखा पश्चिममा सरदर स्थानभन्दा दक्षिणतिर र  पूर्वमा सरदर स्थानभन्दा उत्तर तर्फ अवस्थित रहेको जल तथा मौसम विज्ञान विभाग, मौसम पूर्वानुमान् महाशाखाले जनाएको छ।

मौसमविद् गोविन्द झाका अनुसार अहिले देशभर सामान्यदेखि पूर्ण बदली रही कोशी, गण्डकी, बागमती र मधेस प्रदेशका थोरै स्थानमा भारीदेखि धेरै भारी वर्षा भइरहेको छ।

सप्तरी, मोरङ  र सुनसरीमा धेरै भारी वर्षा भइरहेको उनले बताएका छन्। काठमाडौंको पश्चिमी भूभागहरुमा पनि फाटफुट वर्षा भइरहेको छ।

दिउँसो देशभर आंशिकदेखि सामान्य बदली रही कोशी र गण्डकी प्रदेशका केही स्थानहरुमा भारी वर्षाको सम्भावना रहेको मौसमविद् झाले जानकारी दिए। उनका अनुसार राति गण्डकी र सुदूरपश्चिम प्रदेशमा भारी वर्षाको सम्भावना छ।

मनसुनको न्यूनचापीय रेखा नेपालतिर पूरै नसरेर पूर्वी भाग नेपाल सरिरहेको र पश्चिमी भाग अझै दक्षिणतिरै रहेको झाले बताए।

‘मनसुनी न्यूनचापीय रेखा सरदर स्थानभन्दा माथितिर अथवा नेपालतिर  सर्‍यो भने वर्षा गराउने सम्भावना रहन्छ। दक्षिणतिर सर्‍यो भने मनसुन ब्रेक हुन्छ। नेपालतिर सर्‍यो भने नेपालमा सक्रिय र भारतमा ब्रेक हुन्छ,’ उनले भने, ‘पश्चिमी भाग चाहीँ अझै दक्षिणतिर नै छ।’

आज साँझदेखि भोलिसम्म मध्य र पश्चिम भूभागमा यसको एक्टिभिटी बढ्ने सम्भावना रहेको उनले बताए।