घोराहीको भानु चोकमा मनाईयो भानु जयन्ती, भानुचोक पुनः स्थापित गर्न स्थानीय सरकारलाई आग्रह

२१०औं भानुजयन्ती घोराहीको भानु चोकमा मनाईएको छ । घोराहीको भानु चोकमा जम्मा भएर घोराहीबासीहरुले भानु जयन्ती मनाएका हुन् । साहिन्यकार किशोरचन्द्र गौतमको नेतृत्वमा जयन्ती मनाईएको थियो । त्यस अवसरमा सहभागीहरुले भानुभक्तको सम्झनामा रचनाहरु वाचन गरेका थिए ।

सहभागीहरुले नेपाली भाषामा रामायण पढ्ने अवसर दिने, नेपाली समाजलाई भाषिक स्वाभिमान दिने, भाषिक एकताको बलियो राष्ट्रिय डोरी उपलब्ध गराउने आदिकवि भानुभक्त आचार्यप्रति श्रद्धा अर्पण गरेका थिए । साथै उनीहरुले भानुचोक पुनः स्थापित गर्न घोराही उपमहानगरपालिकालागी आग्रह गरेका थिए ।

तनहूँको चुँदीरम्घामा १८७१ साल असार २९ गते जन्मिएका भानुभक्तले १९१० सालमा ‘भानुभक्तीय रामायण’ महाकाव्य लेखेपछि उनको काव्यिक व्यक्तित्व थप सुपरिचित भएको थियो । उनले ‘प्रश्नोत्तर’, ‘भक्तमाला’, ‘वधूशिक्षा’ लगायतका महत्वपूर्ण कृतिहरू र अन्य फुटकर कविताहरू लेखेका छन् । भानुभक्तको निधन १९२५ असोज ६ गते तनहुँको सेतीघाटमा भएको थियो ।