यी ३२ क्षेत्रमा शेखर समूहको दाबी, देउवाले अरु पार्टीलाई दिए विद्रोहको चेतावनी

नेपाली कांग्रेसका नेता शेखर कोइराला समूहका दोस्रो तहका नेताहरूले पार्टी बुधबार पार्टी कार्यालय सानेपामा धर्ना दिए ।

समानुपातिक निर्वाचनतर्फको बन्द सूचीमा आफ्नो समूहलाई पाखा लगाइएको र न्यायोचित व्यवहार पार्टी सभापति शेरबहादुर देउवाले गर्न नसकेको भन्दै पार्टी कार्यालयमा धर्ना दिएको सो समूहले जनाएको छ ।

पार्टीमा एकलौटी शासन व्यवस्था सभापतिबाट लादिएको भन्दै शेखर समूह विरोधमा छ ।

पार्टीभित्रको आन्तरिक संरचना विस्तारमा मात्र होइन अन्तरपार्टी निर्वाचनमा पनि सभापति देउवाले एकलौटी गरेपछि प्रतिकारमा उत्रनुपरेको शेखर समूहको दावी छ ।

समूहका नेता गुरुराज घिमिरे अन्यायको विरुद्ध लडेको बताउँछन् । उनी ६०–४० भागवण्डाका रचयिता तथा पार्टीमा भागवण्डाको सुरुवात गर्ने सभापति देउवा अर्को समूहलाई कमजोर बनाउन उद्धत भएको बताउँछन् ।

प्रधानमन्त्रीसमेत रहेका पार्टी सभापति शेरबहादुर देउवाको सरकारी निवास बालुवाटारमा पूर्व र वर्तमान पदाधिकारीहरूको बैठक बसिरहँदा सानेपामा धर्ना भएको हो । धर्ना बस्ने अघिल्लो दिन अर्थात् मंगलबार पार्टी कार्यालयमा आकस्मिक पत्रकार सम्मेलन गर्दै प्रवक्ता प्रकाशरण महतले पनि समानुपातिक सूची बुझाउँदा केही त्रुटि भएको स्वीकार गरेका थिए । उनले एकपक्षीय सूची बुझाएको आरोप झुटो भएको भन्दै आरोपको खण्डन गरेका थिए ।

शेखर समूहमा समानुपातिक जस्तै प्रत्यक्षतर्फको टिकटमा पनि एकलौटी हुने भय बढेको छ ।

११० जनाको समानुपातिक सूचीमा एक दर्जन मात्र नेताहरूको नाम समूहबाट परेजस्तै प्रत्यक्षमा पनि त्यस्तै नाजुक अवस्था आउने भय समूहमा हाबी भएको छ ।

समूहबाट डा. मीनेन्द्र रिजाल, अर्जुननरसिंह केसी, बलबहादुर केसी साथै सहमहामन्त्री बद्री पाण्डे केन्द्रीय सदस्य सरिता प्रसाइ, क्यानका अध्यक्ष चतुरबहादुर चन्द जस्ता नेताहरूले टिकट नपाउने भय छ । यी नेताहरूको सिटलाई सुरक्षित गर्न पनि समूह विद्रोहको मैदानमा उत्रिएको नेता जगदिश्वरनरसिंह केसी बताउँछन् ।

“गठबन्धन सही रूपमा सफल हुनका लागि यी नेताहरूलाई बाइपास गरेर हुँदैन,” उनले बाह्रखरीसँग भने ।

गठबन्धनको बैठक चलिरहँदा कांग्रेसले ८०–८५ सिटमा चित्त बुझाउने निश्चित भएको छ । तर, समूहले भने १०० सिट मुनि गठबन्धन गर्न नहुने अडान लिएको थियो । तर, पार्टी सभापति देउवाले गठबन्धन बैठकमा ८०–८५ सिटमा सहमति गरेपछि समूह रुष्ट छ । सिट बाँडफाँटको टुंगो नलागे पनि कांग्रेसले बढीमा ८५ सिट पाउने कांग्रेसभित्र आन्तरिक सर्कुलर छ ।

शेखर समूहले पनि ८० सिटको ४० प्रतिशत सिट आफ्नो समूहले पाउनुपर्ने दाबी गरिरहेको छ । अर्थात् समूहले ३२ सिट आफूहरुले पाउनुपर्ने माग गरेको छ । तर, शेखर निकट नेताहरू २७ सिट भए आफूहरू चुपचाप मान्न तयार भएको बताउँछन् ।

“४० प्रतिशत पाउँदा ३२ सिट पाउनुपर्ने हो । तर, हामी २७ मा मान्न तयार छौं,” ती नेताले बाह्रखरीसँग भने,“समानुपातिकमा हामीलाई यो अवस्थामा पुर्याए । हामी चुप लागे त प्रत्यक्षमा पनि दर्जन पनि सिट नपाइने भयो ।”
भनेजति सिट नपाए समूहका कुनै नेता पनि चुनाव नलड्ने ती नेताको दाबी छ ।

“शेखर दाइ, गगन दाइलगायत कोही पनि नेता चुनाव लड्नुहुन्न यदि सभापतिले सिट सम्मानजनक दिनुभएन भने,” ती नेताको दाबी छ, “हामीले असहयोग गरे चुनाव हारिन्छ भन्ने भय प्रचण्ड, माधव र उपेन्द्रमा पनि छ।”

यी हुन् शेखर समूहले टिकट लिन खोजेका नेताहरु

यो समूहबाट डा. शेखर कोइराला र महामन्त्री गगन थापा बाहेक कसैको पनि सिट सुरक्षित छैन । इलाम क्षेत्र नम्बर २ मा भेषराज आचार्यलाई टिकट दिनुपर्ने माग शेखर समूहको छ । यस्तै झापा २ मा पार्टी नेतृ सरिता प्रसाईंलाई टिकट दिन कोइराला समूहले लबिइङ गरिरहेको छ । तर, यो क्षेत्र माओवादीलाई दिइसकेका कारणले प्रसाईंको व्यवस्थापन पनि चुनौतीको विषय भएको छ ।

समूहबाट मोरङ क्षेत्र नम्बर १ मा डिकबहादुर लिम्वु, मोरङ २ मा डा. मीनेन्द्र रिजाललाई टिकट दिनुपर्ने शेखर समूहले अडान कसिरहेको छ । तर, यहाँ गिरिजा पुत्री सुजाता कोइराला चुनाव लड्ने दाउमा छन् । यस्तै ३ मा सुनील शर्मालाई टिकट दिन शेखर कोइरालाले प्रयास गरिरहेका छन् । यस्तै क्षेत्र नम्बर ६ मा शेखर स्वयम् उमेदवार हुन् ।

शेखर समूहले सुनसरी क्षेत्र नम्बर १ मा राजीव कोइरालाले टिकट पाउनुपर्ने माग गरिरहेको छ । यस्तै सोलुखुम्वुमा बलबहादुर केसीले टिकट पाउनुपर्ने समूहको माग छ ।

मधेस प्रदेशमा शेखर समूहले सप्तरी ४ मा तेजुलाल चौधरीका पक्षमा लबिइङ गरिरहेको छ । चौधरी २०७४ सालको निर्वाचनबाट निर्वाचित सांसद हुन् । यस्तै सर्लाही क्षेत्र नम्बर ४ अमरेशकुमार सिंह तथा धुनषा क्षेत्र नम्बर २ मा रामकृष्ण यादवको टिकट खोसिन नहुने पक्षमा समूह छ । रामकृष्ण शेखर समूहबाट सहमहामन्त्री लडेका नेता हुन् । प्रदेश २ मै शेखर समूहले महोत्तरीमा पनि टिकट मागिरहेको छ । महोत्तरी २ मा किरण यादवले टिकट पाउनुपर्ने माग शेखर समूहले गरिरहेको छ ।

वाग्मती प्रदेशतर्फ सिन्धुलीमा मोहन बराल, काभ्रे २ मा मधु आचार्य, नुवाकोट क्षेत्र नम्बर २ मा अर्जुननरसिंह केसीले टिकट नपाए विद्रोह हुने चेतावनी सो समूहको छ । समूहले धादिङ २ मा रामनाथ अधिकारी वा रमेश धमला तथा चितवन १ मा डा. स्वर्णिम वाग्लेलाई टिकट दिनुपर्ने अडान राखेको छ ।

वाग्लेलाई काठमाडौं ५ मा ल्याए पनि स्वीकार गर्न सकिने शेखर निकट नेताले बाह्रखरीसँग भने ।

गण्डकी प्रदेशमा शेखर समूहले उपसभापति धनराज गुरुङको सिटको ग्यारेन्टी माग गरेको छ । गुरुङ स्याङ्जा क्षेत्र नम्बर १ या २ कुनै पनि क्षेत्रबाट चुनाव लड्ने तयारीमा छन् । यस्तै गोर्खा २ मा राजेन्द्र बजगाईंलाई पनि टिकट दिनुपर्ने अडान समूहको छ ।

ती नेताले बाह्रखरीलाई दिएको जानकारीअनुसार लुम्बिनी प्रदेश अन्तर्गत गुल्मी २ चन्द्र भण्डारी,  रुपन्देही ४ मा प्रमोद यादवलाई टिकट मागिएको छ । यादवले २०७४ को निर्वाचन जितेका थिए ।

यस्तै वामदेव गौतमलाई हराएका सञ्जय गौतमलाई बर्दिया १ बाट टिकट दिनुपर्ने समूहको माग छ । यस्तै कर्णाली प्रदेशको सुर्खेत २ मा हृदयराम थानी तथा सुदुपश्चिम प्रदेशको बाजुरामा सहमहामन्त्री बद्री पाण्डे, दार्चुलामा वर्तमान मन्त्री दिलेन्द्र बडु तथा बैतडीमा क्यानका अध्यक्ष चतुरबहादुर चन्दले टिकट पाउनुपर्ने माग शेखर समूहको छ ।

“यी सिट नपाए हामी चुनाव लड्दैनौं । हेरौं कसरी पार्टी र गठबन्धन जित्दो रहेछ,” ती नेताले भने ।