नेपाली राष्ट्रिय फुटबल टोलीका पूर्वकप्तान गोलरक्षक किरण चेम्जोङले आफू सहभागी फुटबल टिम माजिया स्पोर्टस एन्ड आरसीले माल्दिभ्सको धिवेही प्रिमियर लिगको उपाधि जितेसँगै प्रेमिकालाई विवाह प्रस्ताव राखेका छन् ।
सोमबार भएको फाइनल खेलमा क्लब इगल्सविरुद्ध माजिया स्पोर्ट्स एन्ड आरसीले ५-० गोलअन्तरको जित निकालेसँगै अन्तिममा ट्रफीसहितको तस्बिर खिचाउने क्रममा उनले आफ्नी प्रेमिका कञ्चन निरौलालाई विवाह प्रस्ताव राखेका थिए ।
माल्दिभ्सको मालेमा भएको फाइनल खेल जितेपछि औंठी लगाइदिएर पूर्वकप्तान गोलरक्षक चेम्जोङले निरौलालाई विवाह प्रस्ताव राखेका हुन् । निरौला पेसाले एयर होस्टेस हुन् । आफूले राखेको विवाह प्रस्तावको भिडियो फेसबुक र इन्स्टाग्राममा सार्वजनिक गर्दै चेम्जोङले आफ्नो जीवनको उतारचढावमा साथ दिएको भन्दै निरौलालाई धन्यवाद दिएका छन् ।
उनले यस सिजनको उत्कृष्ट गोलकिपरको उपाधिसमेत पाएका छन् । उनले उत्कृष्ट गोलकिपरको उपाधि पाएको यो दोस्रोपटक हो ।