घोराही, २० असार
लुम्बीनी प्रदेश सरकारले ल्याउन लागेको ‘सञ्चार माध्यम सम्बन्धमा व्यवस्था गर्न बनेको विधयक’ फिर्ताको माग गर्दै लुम्बीनी प्रदेशका १२ जिल्ला शाखाहरुले मुख्यमन्त्रीलाई ज्ञापनपत्र पठाएका छन् । नेपाल पत्रकार महासंघ लुम्बीनी प्रदेशको सर्कुलर अनुसार जिल्ला शाखाहरुले आईतवार जिल्ला प्रशासन कार्यालयमार्फत मुख्यमन्त्रीलाई ज्ञापनपत्र पठाएका हुन् ।
नेपाल पत्रकार महासंघ दाङ शाखाले पनि आईतवार जिल्ला प्रशासन कार्यालय दाङमार्फत लुम्बीनी प्रदेशका मुख्यमन्त्री शंकर पोख्रेललाई ज्ञापनपत्र बुझाएको छ ।
जिल्ला शाखाले प्रमुख जिल्ला अधिकारी रामबहादुर कुरुम्वाङलाई ज्ञापनपत्र बुझाएको हो । ज्ञापनपत्र बुझाउदै जिल्ला अध्यक्ष दुर्गालाल केसीले लुम्बीनी प्रदेश सरकारले प्रदेश सभामा दर्ताकालागी हालै पठाएको सञ्चार माध्यम सम्बन्धमा व्यवस्था गर्न बनेको विधयक विरुद्ध पत्रकार महासंघ रहेको बताउनुभयो ।
‘यो विधयकको उद्धेश्य प्रदेशभरीका सञ्चारमाध्यमहरुको हकहितको रक्षा र नियमन हुनुपर्ने थियो तर यो विधयकको प्रस्तावनादेखी अधिकांश दफा, उपदफामा सञ्चारमाध्यम र सञ्चारकर्मीहरुलाई दण्ड जरिमानादेखी जेल सजायसम्मको प्रावधान राखिएको छ । आजको व्यवस्था ल्याउनकालागी सञ्चारमाध्यम र सञ्चारकर्मीहरुले खेलेको भूमीका बिर्सिएर मिडीया र मिडियाकर्मीहरुमाथी कानुनी डण्डा चलाउने सोच वियधकमा झल्कीएको छ ।’ ज्ञापनपत्रमा भनिएको छ– ‘तसर्थ तत्काल वियधक प्रदेश सभाबाट फिर्ता गरेर पुर्नलेखनको वातावरण मिलाउन माग गर्दै यो ज्ञापनपत्र पेश गरेका छौ । सञ्चारमाध्म र सञ्चारकर्मीहरुको मर्म र धर्म बुझ्नुभएका मुख्यमन्त्रीका हिसाबले तत्काल सरोकारवालाहरुसँगको छलफल गराएर सञ्चारमैत्री विधयक निर्माणको वातावरण बनाउनु हुनेछ भन्ने हाम्रो अपेक्षा छ । हाम्रो मागको सुनुवाई नभए थप आन्दोलनका कार्यक्रम गर्न माध्य हुनेछौ ।’