एमालेले अनावश्यक बखेडा झिकेर संसद् अवरुद्ध गर्‍यो : अर्थमन्त्री डा. महत

अर्थमन्त्री डा. प्रकाशशरण महतले नेकपा एमालेले अनावश्यक रूपमा बखेडा झिकेर संसद् अवरुद्ध गरेको बताएका छन्।

आज कांग्रेस मधेस प्रदेश कार्यालय जनकपुरधाममा आयोजित पत्रकार सम्मेलनमा बोल्दै उनले जनताका प्रतिनिधिको थलो संसद् अवरुद्ध गरिनु कुनै पनि हालतमा तर्कसंगत हुन नसक्ने धारणा राखेका हुन् ।

कांग्रेसका प्रवक्ता डा. महतले प्रतिपक्ष दलले सरकारलाई बाटो देखाउन र सिर्जनात्मक कामका लागि विरोध गर्ने अधिकार राख्ने भए पनि नेपाली जनताको आवाज प्रतिनिधित्व गर्ने थलो संसद्लाई गतिहीन बनाउने अधिकार कसैलाई नभएको जिकिर गरे।

मन्त्री डा. महतले संसदमा गतिरोध उत्पन्न गरिएका कारण संसदमा लैजानका लागि तयार गरिएका विभिन्न विधेयकलाई पनि संसदमा लैजान नसकिएको र कैयौँ महत्वपूर्ण विषयवस्तु र कानुन निर्माणका विषयमा छलफल गर्न नसकिएको बताए।

मन्त्री महतले आर्थिक स्रोत पर्याप्त मात्रामा उपलब्ध हुन नसकेको र मुलुकको वर्तमान आर्थिक अवस्थाका कारण मधेससहितका लक्षित भूगोल र क्षेत्रका लागि पर्याप्त मात्रामा बजेट विनियोजन गर्न नसकिएको जानकारी गराए।

‘आर्थिक स्रोतको पर्याप्तताको अभावमा यसपालि सबैका लागि चित्तबुझ्दो बजेट ल्याउन सकिएन, यसलाई कुनै क्षेत्र या भूगोलका मानिसले विभेदका रूपमा लिनुहुँदैन, यो मेरो आग्रह पनि हो,’ उनले भने । कांग्रेस प्रवक्ता डा. महत नेपाली कांग्रेस सिराहाको सम्मेलनमा सहभागी हुन बिहीबार यहाँ आएका हुन् ।