आज र भोलि हावाहुरी र चट्याङको सम्भावना, सतर्क रहन मौसमविद्को आग्रह

काठमाडौं । देशका विभिन्न भू–भागमा आज पनि हावाहुरी र मेघ गर्जनसहित चट्याङको सम्भावना रहेको छ । जल तथा मौसम विज्ञान विभागका अनुसार प्रदेश १ र सुदूरपश्चिम प्रदेशमा हवाहुरीको सम्भावना रहेको छ ।

“दिउँसो १२ बजेपछि प्रदेश १ र सुदूरपश्चिम प्रदेशमा हवाहुरीसहित चट्याङ र वर्षाको सम्भावना रहेको छ,” मौसमविद् प्रतिभा मानन्धर भन्छिन्, “यसबाहेक अन्य प्रदेशका पहाडी भू–भागमा पनि यो सम्भावना रहेको छ ।” १२ बजेसम्म भने मौसम सामान्य रहने छ ।

हावाहुरी र चट्याङको सम्भावना रहेकाले यसबाट बच्न सतर्क हुन उनको सुझाव छ । आज र भोलि स्थानीय वायु सक्रिय हुने भएकाले हावा–हुरी र मेघ गर्जनसहित चट्याङको सम्भावना रहेको उनको भनाइ छ ।