निर्वाचन अगाडी बामपन्थी नेतृत्वको सरकार निर्माण हुन्छः पोख्रेल

घोराही, १८ असोज

नेकपा एमालेका नेता शंकर पोख्रेलले आगामी निर्वाचन अघि बामपन्थी नेतृत्वको सरकार निर्माणका लागि ‘बाम एकता’ अत्यावश्यक भएको बताउनु भएको छ ।

छलफल चौतारी दाङले घोराहीमा गरेको कार्यक्रममा पोख्रेलले निर्वाचन अघि बामपन्थी नेतृत्वको सरकार आवश्यक परेकाले त्यसैका लागि अहिलेको बाम एकता भएको बताउनु भयो ।

संविधान निर्माण र कार्यान्वयन प्रकृयाका लागि मात्रै कांग्रेससँगको सहकार्य आवश्यक्ता रहेको भन्दै पोख्रेलले अब त्यो सहकार्यको औचित्य समाप्त भैसकेको दावी गर्नुभयो ।

मुलुकलाई सहि निकास दिनका लागि अब बामपन्थीहरुको एकता एक मात्रै विकल्प भएको भन्दै पोख्रेलले माओवादी केन्द्र र एमालेको तालमेललाई ‘अचानक’ नभई केपि ओली नेतृत्वको सरकारका पाला देखीको गृहकार्य रहेको बताउनु भयो ।

राष्ट्रियताको रक्षाका लागि बाम सहकार्यको थालनी गरिएको पोख्रेलले बताउनुभयो । पूर्व सूचना तथा सञ्चार मन्त्री समेत रहनुभएका पोख्रेलले वर्तमान सत्ता गठबन्धन कायम रहँदासम्म राष्ट्रियता कमजोर बन्दै जानुका साथै लोकतन्त्र कमजोर बन्दै जाने महसुस गरी बाम सहकार्यको थालनी गरिएको दाबी गर्नुभयो ।

२०४६ देखि नै बाम तालमेल र सहकार्य सुरु भएर बामपन्थी दलहरुको सहकार्य रहँदै आएको दाबी गर्दै पोख्रेलले बामपन्थी दलहरु बीचको सहमतिलाई अनौठो तरिकाले हेरेर नकारात्मक विश्लेषण गर्न सुरु गरिएको बताउनुभयो ।